![म्यानपावर व्यवसायी बने साँसद, तीनजना श्रममन्त्री पराजीत](https://deshparadesh.com/wp-content/uploads/2017/12/winner-looser.jpg)
काठमाडौं, मंसिर २७-
हालै सम्पन्न भएको निर्वाचन मार्फत बैदेशिक रोजगार व्यवसायी संघका पूर्व अध्यक्ष लालप्रसाद(एलपी) साँवा प्रतिनिधिसभा सदस्यमा निर्वाचित हुँदा श्रम तथा रोजगार मन्त्रालयको जिम्मेवारी सम्हालिसकेका श्रम तथा रोजगार मन्त्री पराजीत भएका छन् । यसरी पराजीत हुने मध्ये वर्तमान श्रम तथा रोजगार मन्त्री फरमुल्लाह मन्सुरसँगै पूर्व श्रम तथा रोजगार मन्त्री दीपक बोहरा तथा पूर्व श्रम तथा रोजगार राज्यमन्त्री टेकबहादुर गुरुङ रहेका छन् ।
संघका पूर्व अध्यक्ष रहेका साँवा झापा क्षेत्र नम्बर ४ बाट विजयी भए । नेकपा एमालेका तर्फबाट उम्मेदवार भएका उनी नेपाली कांग्रेसका उम्मेद्वार देउकुमार थेवेलाई पराजित गर्दै निर्वाचित भए । साँवाले ४३ हजार ५ सय १५ मत प्राप्त गरे भने थेवेले २६ हजार ८ सय २२ मत पाए । साँवा ०६२ सालमा बैदेशिक रोजगार व्यवसायी संघको अध्यक्ष थिए ।
अर्कातर्फ श्रम तथा रोजगार मन्त्री फरमुल्लाह मन्सुर भने बारा क्षेत्र नम्बर ३ बाट पराजित भए । नेपाली कांग्रेसका केन्द्रीय सदस्य समेत रहेका मन्त्री मन्सुरले १६ हजार २६ मत प्राप्त गर्दा संघीय समाजवादी फोरमका रामवावु कुमार यादवले २१ हजार ३ सय ३६ मत प्राप्त गरी विजयी भए । सो क्षेत्रमा मन्त्री मन्सुर बाम गठवन्धनका उम्मेदवार भन्दा पछि रहँदै तेश्रो भए ।
बोहरा पनि बाहिरै
केपी शर्मा ओली नेतृत्वको सरकारमा श्रम तथा रोजगार मन्त्रालय सम्हालेका राप्रपा (प्रजातान्त्रिक) का महामन्त्री दिपक बोहरा पनि यसपटकको निर्वाचन पश्चात संसद बाहिर नै रहनेमा परेका छन् । रुपन्देही क्षेत्र नम्बर ३ बाट चुनाव लडेका उनी नेकपा एमालेका नेता, बाम गठवन्धनका उम्मेदवार घनश्याम भुसालसँग पराजित भए । बोहराले २७ हजार ४ सय २२ मत पाए भनें भुसाल ३२ हजार ८ सय ६६ मत प्राप्त गर्दै विजयी भए । वर्तमान सरकारमा स्वास्थ्य मन्त्री रहेका बोहरा राजनीतिमा निक्कै चतुर खेलाडी मानिन्छन् ।
हारे टेकबहादुर
फ्रिभिसा फ्रिटिकटको निर्णय गरेर निक्कै चर्चा बटुलेका पूर्व श्रम तथा रोजगार राज्यमन्त्री टेकबहादुर गुरुङ पनि यसपटक पराजीत भए । मनाङबाट चुनाव लडेका उनी बाम गठवन्धनका उम्मेदवार नेकपा एमालेका नेता पाल्देन छोपाङ गुरुङसँग पराजीत भए । नेपाली कांग्रेस, मनाङका सभापति समेत रहेका उनी सुशील कोइराला नेतृत्वको सरकारमा श्रम तथा रोजगार राज्यमन्त्री भएका थिए । मन्त्री नभएका कारण श्रम मन्त्रालय चलाउने अधिकार पाएका उनी बैदेशिक रोजगार व्यवसायीको पृष्ठभूमिका हुन् ।