काठमाडौं, मंसिर १९-

वैदेशिक रोजगार विभागमा महानिर्देशक नहुँदा म्यानपावर व्यवसायीले विभागलाई टेर्न छोडेका छन् । विभागका तत्कालिन महानिर्देशक विश्वराज पाण्डे अख्तियारद्धारा भ्रष्टाचारको अभियोगमा गत कात्तिक २९ गते पक्राउ परेपछि म्यानपावर व्यवसायीको मनोमानी बढेको छ । उजुरी परेका म्यानपावर कम्पनीलाई कारबाही गर्ने अधिकार विभागका महानिर्देशकलाई हुन्छ । अन्य कर्मचारीलाई त्यस्तो अधिकार नभएका कारण म्यानपावर व्यवसायीको मनोवल बढेको छ ।

विभागका निर्देशक मोहन अधिकारीले कारबाही गर्ने अधिकार प्राप्त महानिर्देशक नहुँदा हाल उजुरी दर्ता गर्ने, अनुसन्धान अधिकृत तोक्ने र अनुगमन गर्ने काम भएपनि दोषिलाई कारबाही नहुँदा काम प्रभावित भएको बताए । उजुरीको फैसला गर्ने अधिकार महानिर्देशकलाई मात्रै हुने भएकाले पीडितलाई न्याय दिने काम प्रभावित भएको उनको भनाई छ ।

महानिर्देशक पाण्डे पक्राउ परेपछि सात वटा म्यानपावर कम्पनीको कारोबार रोक्का गर्नुपर्ने अवस्था आएपनि त्यसो गर्न नसकिएको उनले बताए । यसैगरी अदालतबाट सिफारिस भएर आएका म्यानपवार दर्ताको काम पनि रोकिएको छ । निर्देशक अधिकारीका अनुसार म्यानपावर कम्पनी दर्ताका लागि अदालतबाट यसबीचमा सातवटा सिफारिस आइसकेका छन् ।

यो पनि पढ्नुहोस् साउदी अरवले सुरु गर्यो टुरिष्ट भिसा