काठमाडौं, मंसिर ८-

बैदेशिक रोजगारमा जानुको मुख्य उद्धेश्य पैसा कमाउन नै हो । बैदेशिक रोजगारमा सधैं जान सक्ने कुरा पनि होइन । उमेर हुँदासम्म विदेशमा रोजगारीका लागि जाने भएका कारण उमेर ढल्किएसँगै स्वदेश फर्किएर बाँकी जीवनका लागि आर्थिक व्यवस्थापन गर्नुपर्ने भएका कारण बैदेशिक रोजगारीमा कमाईरहेका अवस्थामा नै यस पक्षमा विचार गर्नु आवश्यक छ । बैदेशिक रोजगारीमा रहँदा कसरी पैसा जोगाउने ? यसका लागि बैदेशिक रोजगारमा रहेकाहरु र बैदेशिक रोजगारीबाट फर्केकाहरुले यस्तो सुझाव दिएका छन् ।

१. आफ्नो आम्दानी र खर्चको सामान्य योजना बनाउनुहोस् । कति कमाउनुहुन्छ, त्यसमध्ये तपाईले आफ्ना लागि कति रकम नभई हुन्न त्यसको यकिन गर्नुहोस् ।

२. खर्च तालिका बनाउँदा नभई नहुने र नहुँदा पनि हुने गरी दुई भागमा बाँड्नुहोस् । तपाईको आवश्यकतालाई यसरी बाँडफाँड गरेपछि तपाईले आवश्यक परेको समयमा नहुँदा पनि हुने शिर्षकका खर्च कटौति गरेर रकमको व्यवस्थापन गर्न सक्नुहुन्छ ।

३. धेरै रकम एकैपटक घर पठाउने योजना नबनाउनुहोस् । यसैगरी घरमा रकम पठाउँदा पनि कसको नामका र किन पठाउने प्रष्ट हुनुहोस् । तपाईले पठाएको रकम मध्ये कुन शिर्षकमा खर्च हुन्छ र कति बचत हुन्छ त्यसका बारेमा यकिन गर्नुहोस् । पठाएको सवै रकम खर्च मात्र हुने भएमा तपाईको बैदेशिक रोजगारको यात्रा फलदायी हुन सक्दैन ।

४. विदेशमा रकम लगानी गर्दा वा कसैलाई सापटी दिंदा अत्यन्त सावधानी अपनाउनुहोस् । पछिल्लो समयमा धेरै व्यक्तिको रकम त्यसरी नै डुवेका कारण विदेशमा कमाएको रकम छिनभरमै सकिन सक्छ । विदेशमा कुनै पनि समुहमा लगानी गर्नु अघि पनि धेरैपटक विचार गर्नुहोस् ।

५. आफूलाई के सामान अत्यावश्यक हो पहिचान गर्नुहोस् र मात्र खरिद गर्नुहोस् । मोवाईल, ल्यापटप, क्यामेरा जस्ता सामान खरिद गर्नुअघि तपाईले कति दुःख गरेर सो रकम कमाएको हो भन्ने विचार गर्नुहोस् र आवश्यक परेमा मात्र खरिद गर्नुहोस् ।

६. विशेषगरी मलेसियामा जुवा, तास खेल्ने गरे धेरै नेपालीले कमाएको सम्पूर्ण रकम सिध्याउने गरेका हुनाले त्यस्ता व्यक्तिको संगतबाट टाढै बस्नुहोस् । तपाईसँग रकम भएको जानकारी पनि त्यस्ता व्यक्तिलाई नदिनुहोस् र हरेक महिना घरमा रकम पठाउने बानी गर्नुहोस् ।

७. स्थानीय मदिरा सेवनले पैसा मात्र खर्च नभई अकालमा नै ज्यान लैजाने गर्दछ । त्यसैले यस्ता कुराबाट टाढै बस्नुहोस् ।

८. नेपालबाट बैदेशिक रोजगारीमा गएका व्यक्ति अन्य देशका महिलासँग लिभिङ टुगेदरमा बस्ने प्रवृत्ति बढ्दै गएको छ । यो प्रवृत्ति मलेसियामा अझ धेरै देखिएको छ । यसरी फसेका व्यक्तिहरु अन्त्यमा खालीहात स्वदेश फर्किनु परिरहेको छ । त्यसैले यो कुरामा सावधान रहनुहोस् । 

तपाईको अनुभवमा विदेशमा कमाएको पैसा बचाउने अन्य के कस्ता व्यवहार आवश्यक छ ? लेख्नुहोस्