काठमाडौं- साउदी अरबमा अब महिलाहरूले पनि गाडी चलाउन पाउने भएका छन् । साउदी राजा सलमान बिन अब्दुल अजिल अल सौदले महिलाहरूलाई पनि ड्राइभिङ लाइसेन्स जारी गर्न शाही आदेश जारी गरेका हुन् । यसअघि साउदी अरब महिलालाई गाडी चलाउने अधिकार नभएको विश्वकै एक मात्र देश थियो ।

यो आदेशका बारेमा सुझाव दिन ३० दिनभित्र मन्त्री स्तरीय समिति गठन गरिनेछ भने आदेश सन् २०१८ को २४ जुनसम्म लागू हुनेछ । महिला अधिकारवादीहरूले सन् १९९० देखि नै महिलालाई यो अधिकार दिनुपर्ने माग गर्दै आएका थिए । साउदी अरबको यो कदमको विश्वका अधिकारवादीहरूले प्रशंसा गरेका छन् । अमेरिकी राष्ट्रपति डोनाल्ड ट्रम्पले टीट गर्दै यसलाई महिला अधिकारको प्रवद्र्धनका लागि सकारात्मक कदम भनेका छन् । अमेरिकाका लागि साउदी राजदूत खलिद विन सलमानले अब ड्राइभिङ शिक्षा लिन अब महिलाहरूलाई पुरुषको सहमति आवश्यक नभएको र उनीहरूले आफूले चाहेको स्थानमा गाडी चलाउन पाउने बताए । उनले साउदीको यो कदम ‘ऐतिहासिक र महान् दिन’ भएको उल्लेख गर्दै सही समयमा लिइएको सही निर्णय भएको बताए ।   

अभियानकर्ता साहर नसिफले बीबीसीसँग निर्णयले आफू निकै उत्साहित भएको बताएकी छन् । उनले अब छिट्टै आफ्नो ड्रिम कार किन्ने योजनामा रहेको बताइन् । सन् २०१४ मा गाडी चलाएबापत् ७३ दिनको जेल सजाय सुनाइएकी अधिकारवादी लुजेन अल हाथलुलले ‘भगवान्लाई धन्यवाद’ भन्दै ट्वीट गरेकी छन् । कान्तिपुरबाट