प्रकाश न्यौपाने, नवलपरासी, असार ११- 

बीमा, स्वदेशमा बस्नेले गरे पनि नगरेपनि बैदेशिक रोजगारमा जानेहरुका लागि भनें अनिवार्य छ । बैदेशिक रोजगारमा जानेहरुलाई स्वास्थ्य समस्या आइपरेमा वा दुर्घटनामा परेमा आर्थिक सहयोग उपलव्ध गराउने उद्धेश्यले सरकारले यसलाई ५ बर्ष अगाडी अनिवार्य बनाएको हो । 

तर त्यसरी बैदेशिक रोजगारमा जानेहरु मध्ये अधिकाँशलाई यो किन गरिंदैछ भन्ने जानकारी नहुने गरेको देखिएको छ । सरकारले गरेको बाध्यकारी व्यवस्थाका कारण त्यसरी बैदेशिक रोजगारमा जानेहरुले म्यादी जीवन बीमा त गर्छन् तर त्यसका बारेमा उनीहरुले सोधिखोजि नगर्ने गरेका हुन् । तिनै मध्येका एक व्यक्ति हुन् राजेन्द्र पौडेल ।

बर्दघाट नगरपालिका १० भुताहाका पौडेल दुई बर्ष अघि कुवेत गएका थिए । बैदेशिक रोजगारमा गएका उनको मृगौला फेल भएपछि उनी कुवेत पुगेको ६ महिनामा नै नेपाल फर्किए । उनलाई न त जाँदा गरेको म्यादी जीवन बीमाको महत्व थाहा थियो, न त फर्केपछि पाउने राहतका बारेमा जानकारी नै थियो । त्यसैले उनी स्वदेश फर्किएर पनि चुपचाप थिए ।

म्यादी बीमालाई केवल विदेश जान पाउने एउटा प्रकृयाका रुपमा मात्रै बुझेका पौडेल त्यतिखेर चकित खाए जव त्यहि बीमाले उनको जीवनमा महत्वपूर्ण आर्थिक सहयोग मिलेको छ । नेपाल फर्केको केहि समयपछि उनले नवलपरासीको बर्दघाटमा सामी परियोजना अन्तर्गत इन्द्रणी सामाजीक विकास मञ्चद्धारा सञ्चालित सुचना तथा परामर्श केन्द्रबाट आफूले क्षतिपूर्ति पाउन सक्ने जानकारी पाए । आफुले बुझ्दै नबुझि गरेको बीमा वापत क्षतिपुर्ति पाईने कुरा सूचना केन्द्रबाट जानकारी पाए पछि पौडेल छक्क परेका थिए । पौडेल भन्छन् – “मैले कुनै बेला बाध्यतामा परेर गरेको बीमाबाट स्थायी अशक्तता दावी पाइन्छ भन्ने कुरा थाहा पाएँ, अनि म त आश्चर्य चकित भएँ ।”

पौडेल सम्पर्कमा आएपछि सुचना केन्द्रले आवश्यक पर्ने कागजात जुटाइ दिएर थप सहयोगका लागि काठमाडौंस्थीत प्रवासी नेपाली समन्वय समिति –पिएनसिसि) मा सम्पर्क गराइदिएको पौडेलले बताए । उनी भन्छन् –“यहि कारण मैले क्षतिपुर्ति पाउन सकें ।”

आवश्यक प्रकृया पशचात पौडेललाई विमा कम्पनीले दावी रकम वापत रु. ५ लाख तथा आय नोक्सानी खर्च वापत रु १ लाख गरी ६ लाख रुपैयाँ उपलव्ध गराएको छ । यसैगरी क्षतिपूर्ति पाउन योग्य पौडेलले बैदेशिक रोजगार प्रवद्र्धन बोर्डबाट थप रु. ३ लाख पाउनु भयो ।

एक छोरा र दुई छोरीका वुवा रहेका पौडेलले क्षतिपुर्ति रकम प्राप्त गरेपछि आफुलाई आर्थिक बोझ कम भएको बताएका छन् । पौडेल भन्छन् –“मैले त नबुझिकन नै बैदेशीक रोजगार कल्याणकारी कोष र म्यादी बीमा गरें तर अव बिदेश जानेहरु चाहिं बुझेर जानुस् है ।”