विन्देश तामाङ, रियाद, असार १-

साउदी अरवमा आममाफीको तनि महिने समयावधि सुरु भएपछि हालसम्म चार लाख भन्दा धेरै आप्रवासी कामदारले स्वदेश फिर्तिको अनुमति लिएका छन् । त्यसमध्ये १ लाख भन्दा धेरै स्वदेश फर्किसकेको स्थानीय अधिकारीलाई उधृत गर्दै स्थानीय सञ्चार माध्यम साउदी ग्याजेटले समाचार लेखेको छ ।

जवाजातका महानिर्देशक मेजर जनरल सुलेमान अल याह्याका अनुसार साउदी अरवमा अवैधानिक रुपमा बसिरहेका चार लाख भन्दा धेरै आप्रवासी कामदारले यसबीचमा साउदी छोड्ने अनुमति लिइसकेका छन् । हालसम्म चार लाख ४ हजार २ सय ५३ जनाले त्यस्तो अनुमति लिएको उनले बताएका छन् । उनका अनुसार त्यसमध्ये १ लाखले मुलुक छोडिसकेका छन् ।

उनले अझै १० दिन आममाफीको समय बाँकी रहेको भन्दै त्यसको सदुपयोग गर्न आग्रह गरेका छन् । उनले यसबीचमा स्वदेश नफर्किनेहरुलाई आममाफीको समय सकिएपछि कुनै माफी नदिइने र ठूलो आर्थिक जरिवाना सहित कडा कारवाही हुने चेतावनी पनि दिए । आममाफीको समय सकिने वित्तिकै देशभरी सुरक्षाकर्मीले अवैधानिक कामदार खोजिको ठूलो अभियान चलाउने र सो क्रममा फेला पर्नेहरु समस्यामा पर्ने उनले बताए । उनले त्यस्ता अवैधानिक कामदारलाई बस्ने व्यवस्था गर्ने, गाडीमा चढाउने वा रोजगारी दिने कसैलाई छुट नदिइने प्रष्ट पारे ।

९० दिनका लागि दिइएको आममाफी गत मार्च २९ तारिखमा सुरु भएको हो । यसअघि सन् २०१३ मा साउदीले यस्तो आममाफी दिएको थियो । त्यसैले यसबर्षको आममाफी पछि अर्को आममाफीको समय सुरु हुन केहि बर्ष लाग्न सक्ने भएकाले पनि अवैधानिक रुपमा बसिरहेका नेपाली स्वदेश फर्किनु उपयुक्त हुन्छ । साउदी अरवमा १० लाख आप्रवासी कामदार अवैधानिक रुपमा बसेर काम गरिरहेको अनुमान गरिन्छ ।  

यो पनि पढ्नुहोस्

भिसा लागेकाहरु ढुक्क भएर कतार आए हुन्छः राजदूत कोइराला