काठमाडौं, असोज १३ 

गत बर्ष नेपालले फ्रिभिसा, फ्रिटिकटको निर्णय लागु गरेपछि कामदारका लागि बंगलादेश ताकेको मलेसियाले अन्ततः तीन क्षेत्रमा बंगलादेशी कामदारलाई खुल्ला गरेको छ । कारखाना, निर्माण र कृषि क्षेत्र बंगलादेशी कामदारका लागि खुल्ला गरिएको सरकारी अधिकारीहरुलाई उधृत गर्दै स्थानीय सञ्चारमाध्यमहरुले समाचार लेखेका छन् । 

मलेसियाले बंगलादेशी दुतावासलाई बंगलादेशी कामदार लिन मलेसियाले सुरु गर्ने जानकारी दिइसकेको छ मलेसियाका आप्रवासी कामदार हेर्ने मन्त्रालयका सहसचिव अव्दुर रौफले भनेका छन् । बंगलादेशका मेनपावर कम्पनीहरु मार्फत कामदार लिने योजना बनाइएको उनको भनाई छ । रोजगारदाताले अनलाईन मार्फत नै कामदारको मागपत्र पठाउने उनले बताए । बंगलादेशी कामदारले मासिक २३ हजार देखि २५ हजारसम्म न्यूनतम तलव प्राप्त गर्ने उनको भनाई छ । त्यसका लागि कामदारको ६८ हजारको हाराहारी लागत पर्ने उनको भनाई छ । 

मेनपावर कम्पनीले ठगि नगरुन् भनेर अनुगमनलाई बलियो बनाउन एक संयन्त्र निर्माण गरिने र त्यसले सम्पूर्ण भर्ती प्रकृयाको अनुगमन गर्ने सरकारी अधिकारीको भनाई छ । बंगलादेशी मेनपावर एसोशिएसनका अध्यक्ष वेनजीर अहमदले मलेसियामा रोजगारी खुल्ला गरिएको जानकारी पाएपनि हालसम्म आफूहरुले कामदारको माग भनें प्राप्त गरिनसकेको बताएका छन् । उनले छिट्टै माग प्राप्त हुने आशा प्रकट गरे । उनका अनुसार मलेसियाका रोजगारदाताले कामदारको लेभी तिर्नेछन् भनें कामदारले हवाई टिकट, राहदानी, स्वास्थ्य परिक्षण तथा अध्यागमनमा लाग्ने खर्चहरु व्यहोर्ने सम्झौता भएको छ । 

मलेसिया र बंगलादेशबीच कामदार पठाउने विषयमा गत फेब्रुअरी अन्त्यमा एमओयू भएको थियो । हाल मलेसियामा ६ लाख बंगलादेशी कामदार निर्माण र कृषि क्षेत्रमा कार्यरत छन् । 

यो पनि पढ्नुहोस् 

‘खुट्टा भाँचियो, कम्पनी काम गर भन्छ’