दोहा, असोज २७ 

कतारले आगामी डिसेम्वर देखि लागु हुने नयाँ श्रम कानूनका बारेमा जानकारी गराउन दुई महिने अभियान सुरु गरेको छ । यसले नयाँ कानूनका बारेमा सवैबीच बुझाईमा एकरुपता ल्याउने अपेक्षा गरिएको छ । 

कतार ट्रिव्यूनका अनुसार अभियानको नेतृत्व कतारको आन्तरिक मन्त्रालय तथा श्रम मन्त्रालयले संयुक्त रुपमा लिएका छन् । ति मन्त्रालयले चलाउने अभियानका क्रममा रोजगारदाता तथा विभिन्न देशका आप्रवासी कामदारका प्रतिनिधिमूलक नेतृत्वलाई नयाँ कानूनका बारेमा जानकारी दिइनेछ । अभियानका क्रममा कामदार र रोजगारदाताको अधिकारका सम्वन्धमा नयाँ कानूनले गरेको व्यवस्थाका बारेमा जानकारी दिइने समाचारमा जनाइएको छ ।

श्रम मन्त्रालयका डा. ईसा बीन साद अल जफाली अल नुआमीले कानून परिवर्तनका बारेमा रोजगारदाता, दुतावास, उद्योगि, व्यवसायी लगायतलाई समयमै जानकारी दिन आवश्यक भएका कारण अभियान सञ्चालन गरिएको बताए । यसैगरी कामदारे पनि आफ्नो अधिकारका बारेमा जानकारी पाउन आवश्यक भएका कारण अभियानका क्रममा उनीहरुलाई पनि जानकारी गराइने बताए । 

अन्तराष्ट्रिय समुदायको चर्को दवावका कारण कतारले आगामी डिसेम्वर महिनादेखि लागु हुने गरी श्रम कानून परिवर्तनको घोषणा गरिसकेको छ । कतार सरकारले दिएको जानकारी अनुसार परिवर्तित कानूनले घर फर्किन हाल रोजगारदाताको अनिवार्य अनुमति लिनुपर्ने, कम्पनी फेर्न नपाइने, पासपोर्ट रोजगारदाताले नै राख्ने लगायतका विषयलाई पूर्णत हटाउने छ । तर कामदारको पक्षमा काम गर्ने संस्था र व्यक्तिहरुले भनें कतार सरकारले फेरी पनि झुक्याउन सक्ने भन्दै चनाखो भएर हेरिरहेका छन् । 

यो पनि पढ्नुहोस् 

कतारको नयाँ कानूनका महत्वपूर्ण १३ विषय, पासपोर्ट राखेमा जरिवाना देखि कम्पनी फेर्न पाइने सुविधा