लक्ष्मण खनाल युएई 

युएईको अबुधाबीमा १६ सेप्टेम्वर २०१६ मा पहिलो पटक हुन गइरहेको नेपाली म्युजिक अवार्ड २०१६ को तयारी पुरा भएको आयोजकले बताएका छन । युएईका लागि आयोजकहरु एकेन्द्र थापा, अशोक बानियाँ र महेश गिरीले बरदुबईमा पत्रकार सम्मेलन गरेर अवार्डको तयारी पुरा भएको बताए । 

पत्रकारहरुले सोधेका प्रश्नहरुको जवाफ दिदै आयोजक तथा नमस्ते ट्राभल्सका सञ्चालक एकेन्द्र थापाले कार्यक्रमको तयारीको लागि युएईमा हुनुपर्ने सम्पुर्ण व्यवस्थापन सकिएको जानकारी दिए । आवार्ड पाउने कलाकार छनौटको प्रक्रियाको सम्पुर्ण जिम्मेवारी मुल आयोजक संगिक्षा फिल्मस्को रहेको जानकारी दिंदै थापाले विभिन्न १८ विधाका कलाकारहरु छनौट गरेर अवार्ड दिइने बताए । साथै उनले नेपाली गीत संगितलाई  विश्वमा पहिचान गराउन सो कार्यक्रम युएईमा राखिएको पनि जानकारी दिए ।

आयोजक समितिका अर्का सदस्य महेश गिरीले आयोजक, कलाकार, सञ्चारकर्मी सहितको ४५ जनाको टोली नेपालबाट आउने बताउँदै कार्यक्रममा अवार्ड वितरण मात्र नभएर बरिष्ठ कलाकारहरुको विभिन्न साँस्कृतिक प्रस्तुतीहरु पनि रहने जानकारी दिए ।

यसैगरी आयोजक समितिका अर्का सदस्य अशोक बानियाँले कार्यक्रमको लागि टिकटहरु बजारमा आएको बताउदै टिकटहरु ५०, १०० र २०० गरि ३ तहको रहेको जानकारी दिए । उनले सो कार्यक्रममा उपस्थित भएर नेपाली कला, गीत र संगितको संरक्षण र सम्वद्धमा प्रोत्साहन गर्न सम्पुर्ण युएईवासी नेपालीहरुलाई अनुरोध पनि गरेका थिए । 

कार्यक्रमको आयोजकहरु नेपालको लागि संगिक्षा फिल्मस् र युएईको लागि नमस्ते ट्राभल्सको टिम र महेश गिरी रहेको पनि जानकारी दिइएको थियो । युएईको लागि एअरलाइन्स पार्टनर एअर अरविया रहेको पनि जानकारी गराइएको थियो ।