काठमाडौं । गैरआवासीय नेपाली संघ (एनआरएनए) को १७औँ युरोप क्षेत्रीय सम्मेलन २०२६ आयरल्याण्डको राजधानी डब्लिनमा सुरु भएको छ । सम्मेलनको मुख्य भाव ‘संकल्प’ रहेको छ भने यसको सन्देश पहिचानमा एकता, लगानीमा अग्रसरता र समृद्धिप्रति प्रतिबद्धता रहेको छ। एनआरएनएको विस्तारसँगै युरोप क्षेत्रीय बैठक तथा सम्मेलनहरू युरोपस्थित नेपाली समुदायबीच समन्वय, साझा नीति निर्माण, संगठनात्मक सुदृढीकरण तथा नेपालसँगको सम्बन्ध विस्तार गर्ने महत्वपूर्ण मञ्चका रूपमा विकसित भएको एनआरएनएको सचिवालयले जनाएको छ ।

यस वर्षको सम्मेलनमा युरोपसहित विश्वका विभिन्न क्षेत्रबाट एनआरएनए आईसीसी तथा एनसीसीका पदाधिकारी, उद्यमी, पेशाकर्मी, विज्ञ, महिला तथा युवा नेतृत्व, दोस्रो पुस्ताका गैरआवासीय नेपाली र समुदायका प्रतिनिधिहरू सहभागी हुनेछन्। हालसम्म ३५ देशबाट २०० भन्दा बढी सहभागीको सहभागिता सुनिश्चित भएको भने कुल सहभागिता करिब २५० जनासम्म पुग्ने अपेक्षा गरिएको एनआरएनए सचिवालयले जनाएको छ।

सम्मेलनमा राष्ट्रिय स्वतन्त्र पार्टी (रास्वपा) संसदीय दलका उपनेता तथा प्रतिनिधिसभा सदस्य गणेश पराजुली प्रमुख अतिथिका रूपमा सहभागी भएका छन् । यसैगरी बेलायतका लागि नेपालका कार्यवाहक राजदूत बिपिन दुवाडी, परराष्ट्र मन्त्रालयअन्तर्गत श्रम आप्रवासन तथा डायस्पोरा महाशाखाका उपसचिव कृष्णकुमार सुबेदी, डब्लिन सिटी काउन्सिलकी काउन्सिलर सुप्रिया सिंगा, एनआरएनए नेतृत्व तथा विभिन्न क्षेत्रका विज्ञहरूको सहभागिता रहेको छ ।

दुई दिनसम्म सञ्चालन हुने सम्मेलनमा १० वटा प्रमुख विषयगत सत्र रहनेछन्। सम्मेलनले गैरआवासीय नेपाली नागरिकता र अधिकार, नेपालमा लगानी, सुरक्षित आप्रवासन, श्रम तथा आर्थिक कूटनीति, महिला सशक्तीकरण, युवा तथा दोस्रो पुस्ताको सहभागिता, ज्ञान–सीप तथा प्रविधि हस्तान्तरण, राष्ट्रिय समन्वय परिषद एन सिसि हरुको सबलीकरण तथा अन्तरदेशीय विषयहरु लगायतका विषयमा गहन छलफल गर्ने जनाइएको छ।

यस वर्षको सम्मेलनले विशेष रूपमा गैरआवासीय नेपाली नागरिकता र अधिकार, नेपालमा लगानी, महिला, युवा र दोस्रो पुस्ताको सहभागितालाई प्राथमिकता दिएको छ। महिला केन्द्रित छलफलमा उद्यमशीलता, आर्थिक सशक्तीकरण, सुरक्षित आप्रवासन, स्वास्थ्य र कानुनी पहुँचलाई जोड दिइने, युवा तथा दोस्रो पुस्तासम्बन्धी सत्रले नेतृत्व विकास, सूचना प्रविधि, उद्यमशीलता, पहिचान, भाषा–संस्कृति र नेपालसँगको दीर्घकालीन सम्बन्धलाई केन्द्रमा राख्ने जनाकारी दिइएको छ। सम्मेलनले सन् २०३० र त्यसपछिका वर्षका लागि विश्वभरका प्रवासी नेपालीको भूमिका तथा नेपालको विकासमा उनीहरूको साझेदारीसम्बन्धी साझा मार्गचित्र निर्माण गर्ने लक्ष्यसमेत लिएको छ।

आयोजकले सम्मेलनलाई गैरआवासीय नेपालीका अधिकार र सरोकारहरू नेपाल सरकार तथा राजनीतिक नेतृत्वसमक्ष प्रत्यक्ष रूपमा प्रस्तुत गर्ने, युरोपस्थित नेपाली समुदायबीच सहकार्य सुदृढ गर्ने तथा नेपाल र डायस्पोराबीच आर्थिक, सामाजिक र ज्ञानमा आधारित साझेदारी विस्तार गर्ने महत्वपूर्ण अवसरका रूपमा लिएको छ।