काठमाडौँ । संयुक्त अरब इमिरेट्स (युएई) को दुबई तथा उत्तरी इमिरेट्समा रहेका फ्री जोन र अर्धसरकारी कम्पनीहरूमा काम गर्ने नेपाली श्रमिकहरूको लागि नयाँ नियम ल्याएको छ । नेपाली महावाणिज्य दूतावासले भिसा प्रमाणीकरण प्रक्रियालाई थप व्यवस्थित बनाउन नयाँ व्यवस्था लागू गरेको जनाएको छ ।

दुवईस्थित नेपाली महावाणिज्यदूतावासले जारी गरेको सूचना अनुसार मागपत्र प्रमाणीकरण भई भर्ना प्रक्रियामा रहेका श्रमिकहरूले युएई आउनुअघि श्रम स्वीकृतिका लागि अनिवार्य रूपमा संस्थागत भिसा प्रमाणीकरण गराउनुपर्ने छ । फ्री जोन र अर्धसरकारी कम्पनीहरूको हकमा अफर लेटर वा रोजगार सम्झौतालाई अनिवार्य गरेको छ ।

नयाँ व्यवस्था अनुसार सम्बन्धित कम्पनीहरूले निवेदन दिँदा रितपूर्वक भरिएको आवेदन फारामका साथमा भिसा प्रमाणीकरण पत्रका दुई प्रति बुझाउनुपर्नेछ । यस्तै, कम्पनीको छाप र आधिकारिक हस्ताक्षर भएको भिसाको प्रतिलिपि, वैदेशिक रोजगार विभागबाट प्राप्त पूर्व–स्वीकृति पत्र, र स्वीकृत माग पत्र (डिमान्ड लेटर) को प्रतिलिपि पनि पेस गर्नुपर्ने दूतावासले जनाएको छ ।

कम्पनीले पेस गर्ने अफर लेटर वा रोजगार सम्झौतामा श्रमिकको आधारभूत तलब र अन्य सर्तहरू स्वीकृत मागपत्र बमोजिम स्पष्ट रूपमा खुलेको हुनुपर्नेछ । यसका साथै म्यानपावर कम्पनीले निकालेको भिसा ब्यालेन्स रेकर्ड र कम्पनीको आधिकारिक व्यक्तिको परिचयपत्र वा अख्तियारी पत्र पनि आवश्यक पर्नेछ ।

दूतावासले प्रक्रियालाई थप पारदर्शी बनाउन पेस गरिने सबै कागजातहरू सम्बन्धित कम्पनीको आधिकारिक व्यक्तिद्वारा स्व–प्रमाणित गरिएको हुनुपर्ने सर्त राखेको छ ।