काठमाडौं- भक्तपुरका रमेश बाखु हाउस वायरिङ्गको काम गरेर महिनामा १५ हजार बचत गर्छन् । उनले यस्तो काम थालेको एक बर्ष मात्र भयो । ‘बिजुलीको काम सधैं नहुनसक्छ, तर कहिलेकाँहि त मारामार हुन्छ ।’ उनी भन्छन्, ‘जागिर खाएभन्दा यस्तै कामले मलाई सम्मान मिलेको छ ।’

काम गरेर चिनजान बढ्दै गएपछि अहिले उनको कामको व्यस्तता बढेको छ । आफुले काम गरेको ग्राहकहरुको सम्पर्क माध्यमबाट नयाँ–नयाँ घरमा काम पाउन थालिएको उनी बताउँछन् । घरहरु ठेक्कामा लिएर काम गर्नेगरेको उनी बताउँछन् । 

उनले हाउसवायरिङको काम सुरु गर्नुअघि बिजुलीको काम सम्बन्धि तीन महिने तालिम लिएका थिए । तालिम पछि राष्ट्रिय सीप परिक्षण समितिबाट लेभल १ को प्रमाणपत्र लिएका छन् । अहिले अनुभव बढ्दै गएपछि उनी आफ्नो वृत्तिविकासका लागि यो भन्दा माथिल्लो तहको तालिम लिँदैछन् ।

ललितपुर ग्वार्कोमा रहेको पीस प्राविधिक तालिम केन्द्रमा ईण्डष्ट्रीयल ईलेक्ट्रिसियनको तालिम लिँदै गरेका बाखु औद्योगिक क्षेत्र र अपार्टमेन्टहरुको काम लिनका लागि माथिल्लो तहको तालिम आवश्यकता भएको बताउँछन् । पहिले लिएको तालिमबाट ‘सिङ्गल फेज’को मात्र काम गर्न पाईने भएकाले उनले उद्योगको काममा हात हाल्न सकेका थिएनन् । ईण्डष्ट्रीयल ईलेक्ट्रिसियनको तालिम पछि ‘थ्री फेज’ सम्मको काम पाईने हुँदा आफ्नो कामको दायरा विस्तार हुनेमा उनी ढुक्क छन् । अब तालिम पछि उद्योग र अपार्टमेन्टमा आँफैले ठेक्का लिएर काम गर्ने योजनामा उनी छन् । आफ्नो काममा केहि युवाहरुले समेत रोजगारी पाउने उनले बताए ।

उनीसँगै तालिम लिईरहेका मार्खू मकवानपुरका बद्रिकुमार नगरकोटी पनि हाउस वायरिङ्गको कामबाट राम्रो आम्दानी गर्छन् । वृत्तिविकासका लागि थप तालिमको आवश्यकता परेकाले ईण्डष्ट्रीयल ईलेक्ट्रिसियनको तालिम लिएको उनी बताउँछन् । उनीचाँही तीन बर्षको अनुभवका आधारमा लेभल २ मान्यता प्राप्त तालिम लिन आएका हुन् ।

बाखुको जस्तै उनी पनि आँफैले ठेक्का लिएर काम गर्ने योजनामा छन् । अरुकोमा जागिर खाँदा राम्रो आम्दानी गर्न नसकिने भएकाले आफु स्वरोजगार हुन चाहेको उनले बताए । पत्रकारीतामा स्नातक तह उत्तिर्ण गरेका नगरकोटीले राम्रो जागिर खोजी गर्दागर्दै केहि नलागेपछि बिजुलीको काममा हात हालेका थिए । अहिले उनीलाई राम्रै काममा हात हालिएछ भन्ने लागेको छ ।  दिनमा सरदर चार सय आम्दानी गरिरहेका नगरकोटी तालिम पछि सुरुकै आम्दानी दोब्बर भन्दा बढी हुने बिश्वासमा छन् । आफु सरहका धेरै साथीभाई विदेशमा भएको बताउँदै उनले आफुचाँही विदेश जाने सोचाईमा नरहेको बताए ।

ईण्डष्ट्रीयल ईलेक्ट्रिसियनलाई औद्योगिक बिद्युत जडान पनि भनिन्छ । यो तालिम लिएका युवाको माग औद्योगिक क्षेत्रमा राम्रो रहेको तालिम केन्द्रका प्रशिक्षक मिलन बराईली बताउँछन् । अहिले शहरमा ठुला–ठुला भवन बन्ने क्रमले झन यस्ता कामदारको माग ह्वात्तै बढेको उनले जानकारी दिए । नयाँ रोजगारी क्षेत्रका रुपमा हाइड्रोपावरले यस्तो सीप जानेका धेरै युवालाई रोजगारी सिर्जना गरिरहेको उनले बताए । काठमाण्डुमा निर्माण भैरहेका अपार्टमेन्टले तालिम केन्द्रमैं आएर सीप जानेका युवा पठाईदिन आग्रह गर्नेगरेको उनले जानकारी दिए । अझैपनि आवश्यकता अनुासर दक्ष कामदारको अभाव रहेकोले सीप जानेका युवाहरुले सजिलै काम पाउने उनले बताए ।