विराटनगर- मोरङको लेटाङ भोगटेनी–६ का कमल राई मौरीपालनलाई व्यावसायिक रुपमा अङ्गालेपछि उनको जीवनशैली नै फेरिएको छ । उनी मौरी व्यवसायबाट बर्सेनि सरदर पाँच लाख आम्दानी गर्छन । सात वर्षअघि झापाबाट सात घार मौरी खरिद गरेर व्यवसाय सुरु गरेका राईसँग अहिले ४० घार छन् । एक वर्षमा १० देखि १४ क्विन्टल मह उत्पादन गरेर उनले वर्षमा पाँच लाख बचत गर्छन् । झापा र मोरङको बजारमा प्रतिकिलो रु ६०० का दरले मह बिक्री हुन्छ ।

मौरीलाई चरनको कुनै समस्या नरहेको उनको भनाइ छ । वर्षायामको समयमा मौरी पाल्न केही कठिनाइ हुने गरेको र सो अवधिमा चिनीको चास्नी बनाएर खुवाउने गरेको उनी बताउँछन् । भारतमा वर्षौदेखि रोजगारी गर्दै आएका लेटाङ– ७ का राम राई पनि मौरीपालनतर्फ आकर्षित भएका छन् । नौ महिनादेखि यस व्यवसायमा जुटेका उनीसँग यतिखेर १० घार मौरी रहेका छन् ।

लेटाङ– ४ राजारानीमा होमस्टे सञ्चालन गर्दै आएका दलबहादुर रानामगरले तेह्रवटा मौरीको घार राखेका छन् । उनले वार्षिक तीन क्विन्टल मह उत्पादन गरी बिक्री गर्दै र्आएका छन् । मोरङमा ५०० किसान मौरीपालनमा संलग्न रहेको जिल्ला कृषि विकास कार्यालयले जनाएको छ । एकतीस सेरेना र मेलीसेरा जातको मौरी पालन हुने गरेको छ ।

यी दुइटै जातको मौरीबाट गत वर्ष यस जिल्लामा ३३ दलमलव ३ मेट्रिक टन मह उत्पादन भएको कार्यालयका बाली संरक्षण अधिकृत सागर भट्टराईले जानकारी दिए । स्थानीय जातका सेरेनाबाट प्रतिघार आठ देखि १० किलो र उन्नत जातका मेलीसेराबाट प्रतिघार ३० किलोसम्म मह उत्पादन हुने गरेको छ । रासस