उनले उत्पादन गरेका भुरा कञ्चनपुर, डडेल्धुरा, बर्दियासम्मका किसानले खरिद गर्ने गरेका छन्। ‘मैले मागअनुसारको भुरा उत्पादन गर्न सकिरहेको छैन’, उनी भन्छन्, ‘हेचरीमा दक्ष प्राविधिक ज्ञान भएको किसान नभएकाले उत्पादन बढाउन सकिएको छैन।’
रु १२ लाख लगानी गरेर हेचरी सञ्चालनमा ल्याएका चौधरीलाई इलम हेल्भटास नामक संस्थाले ५० प्रतिशत आर्थिक लगानी सहयोग गरेको थियो भने जिल्ला कृषि विकास कार्यालय, कञ्चनपुरले प्राविधिक तथा अन्य सहयोग गर्दै आएको चौधरीको भनाइ छ।
‘मलाई कृषि विकास कार्यालयले धेरै सहयोग गरेको छ’, चौधरीले भने,’माछापालन फस्टाएकै कारण ऋण तिरेर घडेरीसमेत किनेको छु।’ आफू माछापालन व्यवसायमा लागेर सन्तुष्ट रहेको बताउने पल्टु चौधरीलाई परिवारका सबै सदस्यले व्यवसायमा रामै्र साथ दिएका छन्।
‘दुईजनालाई रोजगारीसमेत दिएको छु’, चौधरीले सुनाए, ‘वार्षिक रु १४-१५ लाखको कारोबार हुन्छ। त्यसमध्ये ७ लाख जति फाइदा हुन्छ।’ माछापालनमा जिल्लाकै सफल व्यवसायी मानिने चौधरी माछापालनसम्बन्धी तालिम तथा गोष्ठीमा सहभागी हुन भैरहवा, जनकपुरदेखि काठमाण्डूसम्म पुगेका छन्। ‘माछाको माग स्थानीय बजारमै बढी छ’, उनले भने ‘खपतका लागि बजारको कुनै चिन्ता छैन।’ हाल उनले सिल्लबर, नैनी, रोहुलगायतका जात प्रजातिका माछाका भुरा उत्पादन गर्ने गरेका छन्। ‘महँगोमा एउटा भुरा रु पाँचसम्मको पनि उत्पादन हुन्छ।’ उनले भने – ‘माछापालनका लागि प्राविधिक ज्ञान लिनु जरुरी छ।’ 
सुदूरपश्चिममा कैलालीको सुख्खड र कञ्चनपुरको झलारीपिलाडी नगरपालिका–१ मा गरी दुईवटा हेचरीमात्रै रहेका छन्। रासस