काठमाडौं, कात्तिक १६

साउदी अरवको श्रम मन्त्रालयले हालै गरेको व्यवस्था अनुसार तीन महिनासम्म कुनै कम्पनीले तलव नदिएमा कामदार अर्को कम्पनीमा काम गर्न स्वतन्त्र हुनेछन् । श्रम मन्त्रालयको नवौं चरणको सुधार योजना अनुसार सो व्यवस्था गरिएको हो । गत आइतवार कामदारको सुरक्षा लगायतका विषयमा सो निर्णय गरिएको अरव टाइम्सले समाचार लेखेको छ । यसले १ सय भन्दा बढी कामदार कार्यरत ३ हजार ५ सय ९५ नीजि कम्पनीमा कार्यरत ४ लाख ५ हजार ५ सय ९० कामदारको तलव, सुविधाको सुरक्षा हुने समाचारमा जनाइएको छ ।

मन्त्रालयले नयाँ व्यवस्था सम्पूर्ण नीजि कम्पनीहरुमा लागु हुने जनाएको छ । मन्त्रालयका उपसचिव अव्दुल्लाह अवु थानीले कामदारले समयमा तलव पाउने वातावरण निर्माणका लागि यस्तो व्यवस्था गरिएको जनाएका जनाएका छन् । यो व्यवस्थाले हाल देखिएको रोजगारदाता र कामदारवीचको समस्या पनि हट्ने सरकारी अधिकारीहरुले विश्वास गरेका छन् ।

कुनै कम्पनीले तलव नदिएको पाइएमा त्यस्तो कम्पनीलाई प्रतिकामदार ३ हजार रियालको दरले जरिवाना हुने जनाइएको छ । तीन महिना भन्दा बढी समय कामदारलाई तलव नदिइएको पाइएमा कम्पनी बन्द गरिने र कामदारलाई अर्को कम्पनीमा काम गर्न जान स्वतन्त्रता दिइने थानीले बताए ।