घनश्याम पराजुली, दोहा, साउन १७– गैर आवासिय नेपाली संघ, राष्ट्रिय सम्वन्य परिषद कतारको आशन्न महाधिवेशनलाई मध्यनजर गर्दै नेपाल पत्रकार महासंघ कतार शाखाले ‘सार्वजनिक बहस’ कार्यक्रम सम्पन्न गरेको छ । एनआरएनए एनसिसी कतारका उम्मेदवारहरुसँग गरिएको बहस कतारमा पहिलो पटक आयोजना गरिएको हो । कतारमा स्थापित विभिन्न संघसंस्था तथा पंजिकृत सदस्यहरुको जिज्ञासा मेटाउदै सहमतिका लागि पहल होस भन्ने उद्धेश्यका साथ नितान्त एनआरएनए एनसिसीका उम्मेदवारहरुको विषयमा बहस गरिएको थियो । एनसिसीका अध्यक्ष पदका उम्मेदवारहरु अर्जुन भट्टराइ , बिल गुरुङ्ग , बिनेश तामाङ्ग र मोहम्द साकिर अली रहेका छन । बहसमा भट्टराईले प्रवासी लगानी भित्राउन कोशिष गर्ने भन्दै आफ्नो प्रतिबद्धता सुनाए । अध्यक्ष पदका दाबेदार गुरुङ्गले ‘सहकार्य सहमती जहाँ ,प्रगती उन्नती त्यहाँ’ भन्ने एक सुत्रिय चाहना तथा मन्त्र रहेको भन्दै संस्थाको विधान बुझेमा मात्र नेतृत्व गर्न सकिने बताए । त्यस्तै तामाङ्गले आफ्ना सामाजिक गतिविधीलाई प्रष्ट पारे । अर्का उम्मेदवार साकिर अलीले विगतमा समेत एनआरएनएमा काम गरेको अनुभव रहेको भन्दै आफु सक्षम रहेको बताए । उनीहरुको प्रतिबद्धता माथी करिम बक्स मियाँ, नवराज बिक, मोहन शाह , युवराज पाण्डे, रुद्र बिक, मुनाफ मिँया र शिवराज गौतमले प्रश्न गरेका थिए । उम्मेदवारहरुले सहमति गरेर अगाडी बढ्ने बताएका छन । अध्यक्षका उम्मेदवार भट्टराई काँग्रेस निकट मानिन्छन । त्यस्तै तामाङ्गलाई एमाले तथा जनजाती महासंघको समर्थन छ । गुरुङ्गलाई जनजाती महासंघले साझा उम्मेदवारको रुपमा उठाएको हो । साकिर अलीले स्वतन्त्र रुपमा उम्मेदवारी दिएका हुन । कार्यक्रमका सहभागीहरुले एनआरएनएलाई राजनितीकरण नगर्न आग्रह गरेका थिए । प्रथम उपाध्यक्ष पदका लागि उम्मेदवारी दिएका नगेन्द्र पोखरेल , मोहम्मद मुक्तदा मुसलमान र श्रीकृष्ण भट्टराईले सार्वजनिक बहसमा आफ्नो प्रतिबद्धता सुनाए । सार्वजनिक बहसमा द्वितिय उपाध्यक्षका उम्मेदवारहरु प्रविन गुरुङ्ग,  द्रोण बस्नेत र मोहम्मद उमेर अलाम, महासचिवमा नन्द प्रसाद गर्वुजा, करिम बक्स मियाँ र नन्द्र प्रसाद ढुङ्गाना, सचिवमा प्रेमकुमार बिक, उत्तिमकुमार साह, संजय रजक र मोहम्द औजेर साथै कोषाध्यक्षका लागि भेषराज पराजुली , बुदबल गुरुङ्ग, अब्दुल वासिद, रुपेश यादव, आईसिसी सदस्य हंसराज क्षेत्री , बिनोद भट्टराई , होमनाथ शर्मा र सुनिल मण्डलसँग उनीहरुको उद्धेश्य र प्रतिवद्धताको विषयमा सहभागीहरुले जिज्ञासा राखेका थिए । कार्यक्रममा पालैपालो एक एक पदका उम्मेदवारहरुलाई स्टेजमा बोलाएर बहस गरिएको थियो । सार्वजनिक बहसमा उम्मेदवारहरुले सहमती गर्न तयार रहेको बताईरहे पनि सहमती हुने वा नहुने विषय निश्चित हुन सकिरहेको छैन । उम्मेदवारहरुले विचारको हिसावले संस्था चल्ने हुदा संस्थाको मर्मलाई आत्मसाथ गर्दै काम गर्ने बताए । युवाशक्तीलाई एकिकृत गर्दै समाजीक कार्यमा लगाउन अग्रसर गर्ने जस्ता विषयमा उनीहरु बोलेका थिए । आर्थिक पारदर्शिता , लेखा परिक्षण , श्रमिकका समस्याहरुको समाधानका पहल लगायतका विषयमा बहस गरिएको थियो । सहभागीहरुले समसामयिक विषयमा प्रश्न गरेका थिए । जिरोबाट सहमती थाल्छौ सार्वजनिक बहस कार्यक्रममा कतारमा स्थापना भएका राजनितीक दलका प्रवास संगठनका प्रमुखहरुले सहमतीका लागि जिरोबाट शुरु गर्ने बताएका छन । उम्मेदवारहरुले यहाँका बैचारिक संगठन तथा नेपाली समुदायका अग्रजहरुलाई पुर्ण रुपमा जिम्मा दिएमा सहमतीका लागि पहल गर्ने बताएका छन । सहभागीहरुले बैचारिक संस्था तथा अगुवाहरुका कारण सहमती हुन नसकेको बताएपछी उनीहरुले प्रतिक्रिया दिएका हुन् । जनसम्पर्क समितिका सभापती बिमल सुबेदीले बैचारीक संगठनको संलग्नताले एनआरएनएलाई नखल्बलाएको तर यहाँका केही व्यक्तिहरुले खल्वलाउने कोशिस गरेको बताए । कार्यक्रममा बोल्दै जनप्रगतीशिल मन्चका संरक्षक सनीकुमार वलीले लामो समयसम्म समाजमा देखिएका व्यक्तिहरुबाट नै सहमती हुन नसकेको भन्दै पर्दा पछाडीबाट नै सहमती तोडिने गरेको बताए । ‘कसैलाई पद पुगेको छैन भने हामी अहिले पनि बाहिर बसेर सहयोग गर्न तत्पर छौ, सहमती भएन भने समाज विग्रन्छ त्यसको जिम्मेवारी समाजका अगुवाहरुले लिनुपर्छ’ उनी भन्छन । उम्मेदवारहरुले बैचारिक संस्थालाई जिम्मा दिए सहमती हुने बताए । कार्यक्रममा प्रवासी नेपाली मन्चका अध्यक्ष रामहरी गैह्रेले चुनावी प्रकृयामा जान जटिल रहेकोले सहमतीमा जोड दिनुपर्ने बताए । सहमतीका लागि पटक पटक बैचारिक संस्थाहरुविच बैठक बसेको उनले बताए । ‘सदस्यता जहाँ बृद्धी हुन्छ त्यहाँ चलायमान हुन्छ यसलाई गलत अर्थमा लिनुहुदैन ’ उनी भन्छन । तराई मधेश लोकतान्त्रिक मन्चका अध्यक्ष हुसेन खानले हरेक समाजका मान्छेले समाजमा प्रतिनिधीत्व गर्न पाउनुपर्ने बताए । आफुहरुले अरु बैचारिक संगठन बराबर स्थान नपाएकोमा उनी रुष्ट देखिए । उनले सहमतीका लागि हर कसरत गर्न तयार रहेको बताए । सहमतीमा नै जोड कार्यक्रममा बोल्दै एनआरएनए कतारका पुर्व अध्यक्ष कमलमणी गुरागाईले अव सहमतीका लागि जिरोबाट नै पहल गर्नुपर्ने बताए । त्यस्तै आईसिसीका पुर्व उपाध्यक्ष सागर नेपालले ‘उम्मेदवारहरु समाजका लागि बाधक हुन सक्दैनन्, उनीहरु समाजका लागि केही गर्न आएका हुन तर यहाँ सबै सहमत हुन तयार छन , त्याग गर्न तयार छन को हो त सहमतीको बाधक रु’ भन्दै सहमतीका लागि जोड दिए । आईसिसी उपाध्यक्ष टिबी कार्कीले पत्रकार महासंघले सार्वजनिक बहसको कार्यक्रम आयोजना गरी सबैलाई सहज बनाईदिएको बताए । उनले भने ‘ महासंघले नयाँ आयम कतारबाट थालनी गरेको छ यो उदाहरिणय हो यसलाई निरन्तरता दिनुपर्छ ।’ उनले आन्तरिक बहसमा रहेको भन्ने उम्मेदवारी फिर्ता गर्ने मितीसम्म राम्रा खबर आउने बताए । एनआरएनए कतारका निर्वाचन संयोजक गुरुनारायण रानाभाटले ‘ हामीले सबै कुराको अनुकुलता नियाली रहेका छौ , २८ सय पंजिकृत सदस्यहरुलाई असहजता भएमा निर्वाचन गर्न सकिदैन’ भन्दै एनआरएनए कतारबाट सहजताका लागी पहल गरिदिन आग्रह गरे । उनले विगतको भन्दा अहिले परिवेश फरक रहेको बताउदै समस्याको समाधान गरी सहमीय प्रणालीमा जान आग्रह गरे । कार्यक्रममा बोल्दै एनआरएनए कतारका अध्यक्ष मक्सुद आलमले सहमती गर्न नसके चुनावी प्रकृयामा जानका लागि ७५ जना उम्मेदवारहरुले २ हजार ८ सय ८ पंजिकृतको जिम्मेवारी लिनुपर्ने बताए । कार्यक्रमलाई समापन गर्दै संयोजक गणेश प्रसाद बन्जाडेले सबैलाई धन्यवाद ज्ञापन गर्दै बहसको निचोड यहाँका बैचारिक संस्था तथा अगुवाहरु मिलेर नै सहमती हुन सक्ने बताए । ६ घण्टा लामो चलेको सार्वजनिक बहसमा विभिन्न सामाजिक संस्थाका प्रतिनिधी तथा प्रमुख लगायत पत्रकारहरुको उल्लेख्य उपस्थिती रहेको थियो । सहमति , निर्वाचन र गोलापर्था गर्ने सम्ममा विषयबस्तु कार्यक्रममा उठाईयो । एनआरएनए कतारको महाधिवेशन आगामी १४ अगष्ट र चुनावी प्रक्रिया २१ अगष्टमा हुदैछ । महाधिवेशनका कारण कतारमा नेपाली समुदाय यहाँको तापक्रम भन्दा बढी तातिरहेको छ । यो पनि पढ्नुहोस् युएईमा सामाजिक सञ्जालमा लेखेको अभियोगमा पक्राउ