काठमाडौं, असार १३-

सरकारी तथ्याँक अनुसार हाल सबैभन्दा धेरै नेपाली साउदी अरेबियाको जेलमा रहेको देखिएको छ । त्यसपछि धेरै युएईको जेलमा छन् । संसदमा साँसदहरुले उठाएका प्रश्नको जवाफ दिने क्रममा परराष्ट्र मन्त्री प्रदीप ज्ञवालीले विदेशका जेलमा रहेका नेपालीहरुका बारेमा जानकारी दिंदै यस्तो बताए ।

मन्त्री ज्ञवालीका अनुसार हाल साउदीको जेलमा २ सय १९ जना नेपाली छन् । यसपछि धेरै संयुक्त अरव ईमिरेट्स(यूएई)मा ६३ जना रहेको मन्त्री ज्ञवालीले बताए । थाइल्याण्डको जेलमा ३९ जना, बहराइनको जेलमा ९ जना, सिंगापुरको जेलमा ४ जना, उत्तरको छिमेकी मुलुक चीनको जेलमा ३ जना तथा इजरायल र ओमानको जेलमा २–२ जना नेपाली रहेको जानकारी उनले दिए । यसैगरी लेबनान र कम्बोडियाको जेलमा १–१ जना नेपाली रहेको मन्त्री ज्ञवालीले जानकारी दिए । यसरी जम्मा ३ सय ३५ जना नेपाली विभिन्न देशका जेलमा रहेको देखिएको छ । 

यसैबीच विदेशका अस्पतालहरुमा २० जना नेपाली रहेको मन्त्री ज्ञवालीले संसदलाई जानकारी गराए । उनका अनुसार सबैभन्दा धेरै कतारमा छन् । त्यहाँ ११ जना कोमामा रहेको मन्त्री ज्ञवालीले जानकारी दिए । यसैगरी साउदी अरेबियामा ५ जना, बहराइन र यूएईमा २–२ जना छन् ।

जवाफ दिने क्रममा मृत्युदण्ड पाएकाहरुको सजायलाई आजीवन कैद र गलत आरोपमा जेल परेकाहरुलाई आममाफी दिएर छुटाउन सरकारले पहल गरिरहेको मन्त्री ज्ञवालीले बताए ।

यो पनि पढ्नुहोस् बाबुआमा बैदेशिक रोजगारमा जाँदाको मूल्य (भिडियोमा हेर्नुहोस्)