युएईमा खादाको विषयमा वाक्युद्ध 

रमेश खड्का ‘काशी’ 

गत शुक्रबार युएईको अलऐनमा गैर आबासिय नेपाली संघ (एनआरएनए) युएईको क्षेत्रीय समितिले आयोजना गरेको नव बर्ष साँझ कार्यक्रम सञ्चालन गर्दै थिए गजलकार जे सागर । बिभिन्न अथितिहरुको आसनग्रहण पश्चात बिशेष अतिथिमा बोलाईएको थियो एनआरएन युएईका अध्यक्ष सुदिप कार्कीलाई । कार्कीको नाम बोलाएसँगै उद्घोषक सागरले एनआरएन युएईले अतिथिको सत्कारमा प्रयोग गरिने खादालाई प्रयोग नगर्ने जानकारी स्टेजबाट गराईरहेका थिए । त्यहि अनुसार अध्यक्ष कार्कीले पनि स्वयमसेविकाहरुले खादा पहिर्याउन खोज्दा खादा ग्रहण गर्न मानेन् र ब्याज मात्र ग्रहण गरे ।

उनीसँगै एनआरएनए युएईका युवा प्रतिनिधि निश्चल दाहाल पनि बिना खादा अतिथि आसन ग्रहणमा बसेका थिए । बौद्ध धर्मका लामा गुरुहरुले शुद्द, चोखो, पवित्र र उच्च सम्मानले हेरिने यो खादालाई एनआरएन युएईले प्रयोग नगर्ने जानकारी गराए लगतै युएईमा रहेका नेपालीको सामाजिक सञ्जालमा तरंग आएको छ । 

खादा भनेको चौडाईमा अन्दाजी चार पाँच अम्बल र लम्बाइमा अन्दाजी डेढ दुई हातसम्मको बिशेष कपडा हो । तिब्बतीयन बौद्ध धर्म अनुसार निङ्गमा, गेलुक्पा, कग्युपा, सक्यापामा चढाउनको लागि नै खादाको बिकास भएको हो । यो सिल्क मलमल कपडाबाट बनेको पहेंलो, सेतो र बिभिन्न रंगमा बौद्ध मन्त्र सहितको छापेको कपडाको उपहार हो । खास गरि मान्छे जन्मिएर शुद्द चोख्याई सकेपछि, बिहे, ब्रतबन्ध, छेवार, पास्नी, बिदाइ, स्वागत र कहिँ कतै मृत्युपछी पनि कसैको सम्मानमा प्रयोग हुने यो खादा पछिल्लो समय भने बिभिन्न राजनीतिक पार्टीका नेताहरुको सम्मानमा र सामाजिक संघसस्थाका प्रतिनिधिहरुको सम्मानमा प्रयोग हँुदै आएको छ ।

युएईमा रहेको एनआरएनले बौद्ध धर्मको प्रवित्र वस्त्र खादालाई एकाएक युएईबाट नलगाउने जानकारी गराए लगतै शेर्पा किदुग युएईका अध्यक्ष पासांग शेर्पाले खादाको बहिस्कार गर्ने र खादा प्रयोग नगर्ने समाजसेबीहरुलाई शेर्पा किदुग युएईको कुनै पनि कार्यक्रमहरुमा अतिथिको रुपमा निमन्त्रणा नगरिने घोषणा आफ्नो फेसबुक पेजबाट गरे । 

शेर्पाको योे भनाई सार्वजनिक भएपछि एनआरएन युएईका सल्लाहकार एवम् साहित्यकार तथा लेखक निमेष गिरिले एनआरएन युएई एवम कुनै व्यक्ति र संस्थाले खादालाई बहिस्कार र तिरस्कार नगरेको भनेर प्रस्ट्याएका छन् । गिरीले सामाजिक कार्यक्रममा खादा, माला, ब्याजको सदुपयोग भन्दा पनि दुरुपयोग बढी भएको कारण खादा र ब्याजको प्रयोगमा हुने खर्चलाई जम्मा गर्ने हो भने एक बिद्यार्थीको लागि बर्ष भरिका लागि कापी, कलम सहयोग गर्न सकिने भनेर टिपणी गरेका छन ।

हुन् त युएईमा समय सापेक्ष बिभिन्न बिषयहरुमा सामाजिक सञ्जाल गर्मागर्मी हुनु कुनै नौलो कुरो होइन । गत शुक्रबार यता पुन खादाको बहसलाई लिएर युएईको सामाजिक सञ्जालमा एकाएक गर्मागर्मि बढेको छ । एनआरएन युएईले सामाजिक कार्यक्रमहरुमा सम्मानको लागि प्रयोग हुने खादाको  मान मर्यादा बुझेर अतिरन्जित प्रयोग नगर्ने भनीरहँदा यता नेपाल आदिबासी जनजाती महासंघ युएईका अध्यक्ष डीआर गुरुङ भने प्रयोग नगर्ने सबैलाई छुट छ तर घोषणा गर्नु र अरुलाई पनि आव्हान गर्नुको अर्थ त्यसको मर्यादा र धार्मिक पवित्रतालाई अवमुल्यन गर्नु हो” भनेर आफ्नो धारणा राख्छन । गुरुङ युएईका जल्दाबल्दा र निडर स्वभावका सामाजिककर्मी एवम जनजाती नेता हुन् । जनजाती नेता गुरुङले खादा कसैले प्रयोग नगर्न पाउछ तर सार्बजनिक रुपमा अरुलाई पनि प्रयोग नगर्न आव्हान गर्ने छुट कसैलाई हुँदैन र त्यस्तो कार्यले बौद्ध धर्म विरुद्धको लबिङ् गरेको हो कि भन्ने आशंका पैदा हुन सक्छ भनेर हामीलाई प्रतिक्रया दिए ।

एनआरएन युएईको पछिल्लो खादा प्रयोग बारे सामाजिक सञ्जालको बहस ताती रहँदा उता एनआरएन आइसीसी सदस्य गोपाल कँडेलले भने आफ्नो फेसबुक पेजमा एनआरएनकर्मी के गरुन भन्ने चाहन्छन यिनीहरु ? भनेर दिशाबिहिन प्रश्न गरेका छन् । कँडेलले अनावश्यक खर्च कम गर्न खादा प्रयोग नगरौ भन्दा पनि बिबादित हुने, मानव तस्करी बन्द गरौ भन्दा पनि बिबादित हुने र सबै समस्याको समाधानमा जुटौं भन्दा पनि छलफलमा उपस्थित नहुनेहरुलाई कि त आफु गर्नु नत्र काम गर्नेहरुको बिचमा तगारो नबन्न सुझाव दिएका छन् ।

हुन त कसैको सम्मानमा प्रयोग हुने खादा युएईमा मात्र नभएर देश विदेशमा पनि बिवादित बनिरहन्छ । केहि समय पहिले नेपाली चलचित्र बिन्दास ३ कि नायिका शुभेच्छा थापाको फोटो सुटको बिषयलाई लिएर निकै बिवादित भएको खादा विवाद पछि नायिकाले अन्जानमा भएको गल्ति भनि माफी मागे पश्चात समाधान भएको थियो ।

आशा गरौ, युएईमा तातीरहेको बौद्ध धर्मको सम्मानमा प्रयोग हुने बस्त्र खादाको बिषय पनि कुनै धार्मिक र निष्ठाको भावले गलत दुस्प्रचार नभई युएईमा हुने सामाजिक संस्थाहरुको खर्च कम गर्ने सोच र परिपाटीको विकासमा आधारित रहोस । खादा प्रतिको सम्मान अझ बढोस् ।

(खड्का पत्रकार महासंघ युएईका सदस्य हुन ।)

What’s your Reaction?
+1
0
+1
0
+1
0
+1
0
+1
0
+1
0
+1
0

प्रतिक्रिया

सम्बन्धित खवर

ताजा समाचार

लोकप्रिय

Custom Fields: