काठमाडौं, दुबईमा मृत्युदण्डको सजाय सुनाईएका अनिस खालिङ राईको जीवन बचाउका लागि उठाईएको ब्लड मनी उहि प्रकृतिको घटनामा खर्च गरिने अनिस खालिङ राई बचाउ अभियान समितिले बताएको छ ।

काठमाडौंमा शुक्रवार पत्रकार सम्मेलन गरि यस्ताे जानकारी दिएको छ । राईको जीवन बचाउन कुनै अपरिचित व्यक्तिले ब्लड मनी बापतको सम्पूर्ण पैसा तिरिदिएको भन्ने खबरसँगै उठाईएको पैसा के गर्ने भन्ने अन्यौल मेटाउन समितिले पत्रकार सम्मेलन गरि यो जानकारी दिएको हो । पत्रकार सम्मेलनमा बोल्दै समितिका सञ्चार संयोजक प्रकाश खालिङले भने ‘राईको जीवन बचाउन कसैले पैसा तिरिदिएको रहेछ, उ को हो भन्ने अझै खुलेको छैन । हामी पनि अन्यौलमा छौं ।’ यदि कसैले ब्लड मनी तिरिदिएको र यहि आधारमा राई छुटे भने उनी नेपाल फर्किएपछि ट्रष्ट खडा गरेर विदेशमा जेलमा रहेका नेपालीलाई सहयोग गर्न उठाईएको रकम खर्च गरिने उनले बताए ।

समितिले देश तथा विदेशमा गरि राईको जीवन बचाउन उठाएको ३ लाख ५ हजार दिराम गएको साउन २९ गते दुवई अदालतमा बुझाउन नेपाली दुतावासमा पैसा पठाएको थियो । युएईमा रहेको नेपाली दुतावासले अदालतमा पैसा बुझाउन जाँदा त्यसअघिनै ‘द एटोर्नी जेनेरल अफिस, जुडीसीएल डिपार्टमेन्ट’ का प्रमुखलाई कसैले पैसा बुझाईसकेको पत्ता लागेको थियो । ब्लड मनी जम्मा भैसकेकाले नेपालबाट पठाईएको पैसा फिर्ता गर्ने प्रक्रिया सूरु भैसकेको सञ्चार संयोजक खालिङले जानकारी दिए ।

पैसा फिर्ता गर्ने प्रक्रियासँगै परिवारलाई भने शंका र उपशंकाले झस्काइरहेको उनले बताए । दुबईमा जेलमा रहेका राई छुट्ने प्रक्रिया अब के हुन्छ भन्ने बारेमा परिवारले स्पष्ट जानकारी नपाएको उनले बताएका छन् ।

कामको खोजीमा २०६८ सालमा अनिस दुवई पुगेका थिए । सँगै काम गर्ने एक पाकिस्तानी नागरिक हत्याको आरोपमा आबुधाबीको अदालतले उनलाई मृत्युदण्डको सजाए सुनाएको थियो । त्यसबापत ब्लड मनी तिरेपछि उनको सजाए माफि हुने भएकाले नेपालमा समिति गठन गरेर रकम उठाईएको थियो ।

सँगै काम गर्ने एक जना समलिगीं पाकिस्तानी नागरिकले अनिसमाथि यौनदुव्र्यवहार गरेपछि प्रतिकार गर्दा उक्त पाकिस्तानी नागरिकको मृत्यु भएको परिवारका सदस्यले बताएका छन् ।