प्रभातकुमार मिश्र, जनकपुर चैत्र २५-

युएईमा आकर्षक तलव हुने बलादियाको काममा लगाइदिने भन्दै केहि युवाको रकम ठगेर एउटा समुह फरार भएको छ । गत असोज ९ गते रोजगारीमा पठाउने भन्दै पासपोर्ट र १ लाख १० हजार रकम उठाएर रोजगारीमा नपठाएको र पछि रकम फिर्ता माग्दा एजेण्ट बेपत्ता भएको भन्दै रकम र पासपोर्ट फिर्ता गराइदिन भन्दै पीडितले धनुषास्थीत सुचना केन्द्रमा निवेदन दिएका छन् ।

जनकपुर उपमहानगरपालिका १३ पिडारीका सन्तोष पासवानले युएई जान सो रकम असिम शर्मा भनेर चिनाइएका उमेश खड्कालाई बुझाएको बताएका छन् । खड्कालाई जनकपुर नै माइती भएकी एक महिला सुस्मीता श्रीवास्तवले शालिनदी नामको मेनपावर कम्पनीका सञ्चालक भन्दै चिनाएको र सोही आधारमा आफूले रकम बुझाएको पासवानको भनाई छ । उनले ८० हजार नगद खड्कालाई हातैमा बुझाएको र ३० हजार कृषि विकास बैंक, कपन शाखामा जीवनकुमारी खड्काको नाममा रहेको खातामा असोज २३ गते जम्मा गरिदिएका थिए । खड्काले सो खाता आफ्नी आमाको भएको बताएका थिए । हाल सो खाता बन्द रहेको बैंकले जानकारी दिएको छ ।

आफु लगायत अन्य दुईजनाको रकम उठाएर एजेण्ट बेपत्ता भएपछि पासवानले श्रीवास्तव तथा खड्काबाट क्षतिपूर्ति सहित रकम दिलाइदिन र पासपोर्ट फिर्ता गराइदिन आग्रह गर्दै निवेदन दिएका हुन् ।

पासवानले एजेण्ट भनेका सुस्मिता श्रीवास्तवले भनें आफूले खड्कालाई नचिनेको र पीडितले आफ्नो नाम अनाहकमा फसाएको बताएकी छिन् । उनले आफू पहिले सक्सेस नेपाल ग्लोवल नामको मेनपावर कम्पनीमा काम गर्ने गरेको र पासवान लगायतका युवा आएपछि सुरुमा आफूले पासपोर्ट लिएपनि पछि उनीहरुले भने अनुसारको काम नभएपछि पासपोर्ट उनीहरुलाई नै फिर्ता गरिदिएको दावी गरेकी छिन् । श्रीवास्तवले पछि ति युवाले असिम शर्मासँग आफैं सम्पर्क गरेको र उनलाई रकम बुझाउन जाँदा आफूलाई सँगै गइदिन आग्रह गरेपछि माइती गाउँका युवाका लागि सहयोग स्वरुप आफू पनि गएको र रकम दिएको ग्यारेण्टी माग्दा असिमले नेपाल एसबीआइ बैंकको रु, ८० हजारको चेक दिएको बताइकी छन् । उनले ति व्यक्तिलाई आफूले नचिन्ने दावी गरेकी छन् ।

ग्यारेण्टीस्वरुप दिइएको नेपाल एसबीआइ बैंकको सो चेकमा खड्काको दस्तखत मिल्दैन । उनको खाता नम्वर मिलेपनि सो खातामा त्यति रकम पनि नभएको र दस्तखत समेत नमिलेपछि आफूहरु ठगिएको भन्दै पीडित सहयोगका लागि सुचना केन्द्र पुगेका हुन् ।

यो पनि पढ्नुहोस् विदेश पठाउने नाममा एजेण्टले हडपेको १ करोडको जग्गा १३ बर्षपछि फिर्ता