अम्विका दाहाल, खोटाङ, फागुन २७-

वैदेशिक रोजगारीका लागि साउदी अरव पुगेका आठ जना नेपाली कामदारको बिचल्ली भएको छ । चारवर्ष देखि वैदेशिक रोजगारीको सिलसिलामा साउदीमा रहेका उनीहरु विगत एकवर्षदेखि काम दाम नपाएपछि उनीहरु विचल्लीमा परेका हुन ।

काठमाडौंस्थित इल्मेस मेनपावर मार्फत रोजगारीका लागि साउदीको अल्फाक कम्पनीमा पुगेका खोटाङका पृथ्बी विक लगाएत आठ जना कम्पनीले काम दाम नदिनुका सार्थ बसिरहेको कोठाबाट समेत निकालिदिएपछि थप समस्यामा परेका छन । कम्पनीले कोठाबाट निकालिदिए पछि जनप्रगतिशिल नामक संस्थाको सहयोगमा बसिरहेका उनीहरुले आफुहरुलाई जति सक्दो चाँडो नेपाल फर्काउन पहल गरिदिन आग्रह गरेका छन् । पीडितका परिवारले उद्धारका लागि सुरक्षित आप्रवासन परियोजनाद्धारा खोटाङ सञ्चालित सुचना केन्द्रमा मा निवेदन दिएका छन ।

समस्यामा पर्नेहरुमा बिराटनगरका भीमप्रसाद दाहाल, उदयपुरका देवान श्रेष्ठ, जाजरकोटका बिष्णु नेपाली, सर्लाहीका राम बहादुर मलोन, धनुषाका रामसागर मण्डल, सिराहाका बिन्देश्वर मोचि र पाँचथरका सन्तोष आङ्देम्बे छन ।

अलपत्र परेकाहरु मध्ये कसैलाई मेसन तथा कसैलाई कार्पेन्टरको काममा भन्दै लगिएको भएपनि सुरु देखि नै कम्पनीले करार बमोजिमको काममा नलगाएको पिडितको गुनासो छ । “पहिला त काम फरक भएपनि तलव पाउँदै थियौं तर विगत एक वर्ष देखि भने न काम पायौं न दाम” विकले फोनमा भने “नेपाल जान्छौं भन्दा पनि कम्पनी कानमा तेल हालेर बसेको छ ।”

एक वर्षदेखि कम्पनीले काम दाम नदिएर पैसा नपठाएको भन्दा घरपरिवारलेसम्म विश्वास गर्न छोडेको खोटाङ अर्खौलेका बिकले बताए । वैदेशिक रोजगारीको रकमबाट घरपरिवारको गुजारा चलाईरहेका उनीहरुको परिवार समेत अप्ठेरोमा परेको छ ।

नेपाल फर्किन पाए अर्को देश जाने योजना बनाएका उनीहरु धेरै पटक दुतावास समेत धाइसकेका छन । खान बस्न समेत अर्काको सहयोग मागिरहेका उनीहरु साथिहरुसंग पैसा माग्दै पटक पटक दुताबास जाँदा पनि फर्किने व्यवस्था मिलाउन नसकेको उनीहरुको गुनासो छ । दुताबासले कम्पनीसंग कुरा गर्दैछौं चाँडै हुन्छ भनेको धेरैपटक भइसकेको उनीहरुले बताए ।

यो पनि पढ्नुहोस् बल्ल स्वदेश फर्किन पाए थनेत