काठमाडौं, २४ असोज– बढ्दो सडक दुर्घटनामा कमी ल्याउन नेपाल यातायात स्वतन्त्र मजदुर संगठनले अभियान सञ्चालन गरेको छ । सडक दुर्घटना न्युनिकरण गर्ने अभियान अन्तरगत नेपाल यातायात स्वतन्त्र मजदुर संगठनले काठमाडौंस्थित त्रिभुवन अन्तराष्ट्रिय विमान स्थल प्रवेशद्धार अघि शुक्रबार विहान चालकहरुका लागि प्रशिक्षण कार्यक्रम गरेको छ । विमानस्थल प्रवेशद्वार अघि टेण्टमा चालकहरुलाई भेला गराई दुर्घटनाका कारणहरु, दुर्घटनाका असर तथा न्युनिकरणमा चालकहरुको भूमिकाका विषयमा प्रशिक्षण प्रदान गरिएको हो । ट्राफिक प्रहरी महाशाखाका प्रहरी निरिक्षक विपिन गौतम तथा ट्राफिक प्रहरी वृत गौशालाका प्रमुख तथा प्रहरी निरिक्षक शुकदेव खनालले सहभागी १ सय २० जना चालकहरुलाई प्रशिक्षण दिएका थिए । ‘दुर्घटना हुनुमा अन्य थुप्रै कारणहरु हुदां हुंदै यातायात मजदुरहरुलाई मात्र दोषी देखाउने गरिएको छ,’ संगठनका महासचिव भीमज्वाला राई भन्छन्–‘त्यसलाई खण्डन गर्दै तथ्य सार्वजनिक गर्न अभियान सञ्चालन गरिएको हो ।’ अनियन्त्रित सवारी आयात, सिमित, सांघुरा र जिर्ण सडक, यातायात व्यवस्थापन तथा सञ्चालनमा राज्यको नीति नहुनु पनि दुर्घटनाको कारणहरु हुने गरेको भएपनि चालकलाई मात्र दोषी देखाउनु अव्यवहारिक भएका उनको भनाई छ । अन्तराष्ट्रिय यातायात मजदुर महासंघ आईटीएफको कार्यसप्ताहव्यापी कार्यक्रमसंगै जोडेर यो अभियानलाई देशभरी सञ्चालन गर्ने पनि राईले बताए । संगठनका केन्द्रीय उपाध्यक्ष मांयां वेगाको प्रमुख आतिथ्यमा भएको कार्यक्रमको अध्यक्षता संगठन एयरपोर्ट ट्याक्सी ईकाईका अध्यक्ष शंकर थापाले गरेका थिए ।