काठमाडौं, कात्तिक १८-

रोजगारीका लागि युएई जाने कामदारसँग नेपालस्थीत मेनपावर कम्पनीहरुले सेवा शुल्कको नाममा रकम उठाउन नपाउने भएका छन् । नेपाल र युएईका सरकारी प्रतिनिधिवीच काठमाडौंमा दुईदिनसम्म चलेको बैठकमा यस विषयमा सहमति भएको हो । कामदार पठाएवापत सेवा शुल्क रोजगारदाताले नै उपलव्ध गराउने विषयमा दुई देशवीच सहमति जुटेको हो ।

श्रम रोजगार तथा सामाजिक सुरक्षा मन्त्रालयका सहसचिव रामप्रसाद घिमिरे नेतृत्वको नेपाली प्रतिनिधिमण्डल र नेपाल आएको युएईको प्रतिनिधिमण्डलले कामदार आदानप्रदानका विषयमा विभिन्न विषयमा सहमति जुटाएको हो । दुई देशवीच भएको सहमति अनुसार अव युएईमा रोजगारीका लागि जाने नेपाली कामदारको भिसा तथा हवाई टिकटको शुल्क तथा सेवा शुल्क रोजगारदाताको जिम्मा हुनेभएको छ ।

सो निर्णय पश्चात कामदारले वैदेशिक रोजगार बोर्डमा जम्मा गर्ने कल्याणकारी कोष वापतको रकम, वीमा शुल्क र अभिमुखिकरण तालिमको खर्च मात्र व्यहोर्नु पर्नेछ । अन्य खर्च रोजगारदाताले नै उपलव्ध गराउनु पर्नेमा दुवै देशका प्राविधिक टोली सहमतिमा पुगेका हुन् । यो नेपालका लागि महत्वपूर्ण नीतिगत उपलव्धी हो । यसले अव वैधानिक रुपमा नेपाली कामदारसँग रकम उठाउने हैसियत रोजगारदाताको हुनेछैन ।