काठमाडौं, असोज १५-

मलेशिया सरकारले अवैधानिक रुपमा मलेशियामा बसेर कार्यरत विदेशी कामदारलाई न्यून जरिवाना तिरेर फर्किन सञ्चालन गरेको व्याक फर गुड कार्यक्रम अन्तर्गत हालसम्म २ हजार भन्दा धेरै नेपाली स्वदेश फर्किएका छन् । अगष्ट महिनादेखि सुरु भएको आममाफी कार्यक्रम अन्तर्गत उनीहरु फर्किएका हुन् ।

मलेशियाका लागि नेपाली राजदूत उदयराज पाण्डेले मलेशियाले दिएको यो अवसरलाई यो भन्दा धेरै नेपालीले सदुपयोग गर्ने अपेक्षा प्रकट गरे । उनले भिसाको म्याद सकिएर पनि मलेशियामा नै बसिरहेका नेपाली व्याक फर गुड कार्यक्रमको समयावधि भित्रै स्वदेश फर्किने अपेक्षा पनि प्रकट गरे । राजदूत पाण्डेले मलेशियामा ११ हजार देखि १४ हजार नेपाली अवैधानिक रुपमा बसिरहेका अनुमान गरिएको र त्यसमध्ये २ हजार स्वदेश फर्किसकेको बताए ।

मलेशियाली सञ्चार माध्यम बनर्मासँगको कुराकानीका क्रममा राजदूत पाण्डेले बाँकी रहेका अन्य नेपाली पनि चाँडै स्वदेश फर्किनेमा आफू आशावादी रहेको बताए ।

आगामी डिसेम्वर अन्तिमसम्म चालु रहने व्याक फर गुड कार्यक्रम अन्तर्गत अवैधानिक रुपमा बसिरहेकाहरु ७ सय रिंगिट जरिवाना तिरेर विना कुनै जेलसजाय स्वदेश फर्किन पाउँदछन् । यसका अलावा दूतावासबाट ट्राभल डकुमेण्ट बनाउने तथा स्वदेश फर्किने टिकटको व्यवस्था भनें कामदार स्वयंले गर्नुपर्दछ ।

स्वदेश फर्किन चाहने नेपालीलाई यसपटक दूतावासले उचित सहयोग गरिरहेको छ । उनीहरुको  कागजात बनाउने, अध्यागमन कार्यालयसम्म लैजाने र फर्काउने व्यवस्था दूतावासले नै गरेको छ । त्यसैले यसपटक आमामाफीको समयमा यसअगाडी जस्तो दलालहरु सकृय हुन पाएका छैनन ।

मलेशियामा ३ लाख ५७ हजार नेपाली वैधानिक रुपमा कार्यरत रहेको मलेशिया सरकारको तथ्याँक छ । त्यहाँ मुख्यगरी नेपालीहरु उद्योग, सुरक्षा गार्ड, सेवा क्षेत्रमा कार्यरत छन् ।