दोहा, असोज ५-

मानवअधिकारवादी संस्था एम्नेष्टि ईण्टरनेशनलले कतारमा सयौं कामदारले काम गरेको तलव नपाउने गरेको र जवर्जस्ती विना तलव स्वदेश फर्काइएको बताएको छ । कतारले विदेशी कामदारको अधिकारको पक्षमा काम गरेको बताइरहेपनि व्यवहारमा त्यो लागु नभएको एम्नेष्टिको भनार्ई छ ।

एम्नेष्टि ईण्टरनेशनलले सार्वजनिक गरेको रिपोर्टमा बाध्यकारी श्रमको अवस्था कायमै रहेको उल्लेख छ । सन् २०२२ मा विश्वकप फुटवल प्रतियोगिताको आयोजक मुलुक कतारमा नेपाल, भारत, फिलिपिन्स लगायतका मुलुकबाट रोजगारीका लागि आएका झण्डै २० लाख श्रमिक कार्यरत छन् ।

श्रमिकमाथि शोषण हुने गरेको आवाज पटक पटक उठ्दै आएपछि र विश्वकप फुटवल प्रतियोगिता नै आयोजना गर्न मुस्किल अवस्था सिर्जना भएपछि कतारले श्रम क्षेत्रमा आमुल परिवर्तनको प्रतिवद्धता सहित केहि सुधारका कार्यक्रम लागु गरेको छ । उसले छिटो छरितो रुपमा श्रमिकका गुनासो सुन्ने र समाधान गर्ने तथा तलव सम्वन्धी कुनै समस्या भएमा तत्काल समाधान गर्ने उपाय अवलम्वन गरेको जानकारी विश्व समुदायलाई गराएको छ । तर एम्नेष्टिको पछिल्लो रिपोर्टले भनें कसरी सयौं कामदार अहिले पनि तलव विना नै काम गर्न बाध्य बनाइएका छन् र उनीहरुको समस्याको सुनुवाई नभईरहेको विषय उल्लेख गरेको छ ।

कतारले भनें श्रम क्षेत्र सुधारका लागि पछिल्लो समयमा आइएलओ लगायतसँगको सहकार्यमा  काम भइरहेको र धेरै सुधार भइसकेको बताएको छ । कुनै गुनासो भएमा तत्काल सम्वोधन गर्ने गरिएको कतारी सरकारले धारणा सार्वजनिक गरेको छ ।

रिपोर्टमा तीनवटा कम्पनीबाट तलव पाउन नसकेका २ हजार कामदारले गुनासो दर्ता गराएको उल्लेख छ ।