काठमाडौं, असार २५-

सरकारले नेपालमा कार्यरत श्रमिकको न्यूनतम ज्याला प्रतिमहिना १३ हजार ४ सय ५० तोकेको छ । यसैगरी साउन देखि दैनिक ज्याला ५ सय १७ तथा प्रतिघण्टा ज्याला रु ६९ भएको छ । रोजगारदाताहरु तथा ट्रेड युनियनहरुबीच भएको सहमति अनुरुप नै सरकारले न्यूनतम ज्याला तोकेको हो । यसअघि श्रमिकको न्यूनतम ज्याला ९ हजार  ७ सय थियो ।

श्रम रोजगार तथा सामाजिक सुरक्षा मन्त्रालयमा आयोजित कार्यक्रममा मन्त्री गोकर्ण विष्टले ईतिहासमै पहिलो पटक धेरै प्रतिशतमा श्रमिकको तलव बृद्धि भएको बताए । यसपटकको बृद्धि ३९ प्रतिशत हुन आउँछ । मन्त्री विष्टले आगामी साउन महिना देखि नैै न्यूनतम ज्याला कार्यान्वयन हुने भन्दै श्रमिकको मानवोचित रुपमा बाँच्न पाउने अवस्था निर्माण गर्न सरकार प्रतिवद्ध रहेको बताए । यो न्यूनतम तलव भएको भन्दै मन्त्री विष्टले यसभन्दा बढी दिन र सामुहिक सौदावाजीको अभ्यास गर्न खुल्ला नै रहेको धारणा राखे ।

सरकारले तोकेको न्यूनतम ज्याला मध्ये ८ हजार ४ सय ५५ आधारभूत तलव हो भने ४ हजार ९ सय ९५ महंगी भत्ता हो ।

सो अवसरमा बोल्दै नेपाल उद्योग वाणिज्य महासंघकी अध्यक्ष भवानी राणाले सहमति कार्यान्वयन गर्न रोजगारदाताहरु प्रतिवद्ध रहेको भन्दै समृद्ध नेपाल बनाउने अभियानमा आफूहरु हातेमालो गर्न सदैव तयार रहेको बताइन् । राणाले श्रमिकलाई रोजगारदाताहरुले आफ्नो परिवारको सदस्य ठान्ने गरेको भन्दै श्रमिक र रोजगारदाताबीच नङ र मासुको सम्वन्ध हुने धारणा राखिन् । उनले नेपालमा उत्पादकत्व बृद्धि गर्नु आवश्यक रहेको भन्दै उत्पादनको लागत नेपालमा धेरै  पर्ने गरेको र यसलाई घटाउन सके मात्र विश्वबजारमा प्रतिस्पर्धा गर्न सकिने धारणा राखिन् ।

संयुक्त ट्रेड युनियन समन्वय केन्द्र(जेटीयूसीसी) का अध्यक्ष विश्वनाथ प्याकुरेलले हाल बृद्धि भएको ज्याला यथेष्ठ नरहेको धारणा राखे । उनले हाल भएको सहमति कार्यान्वयन गर्न रोजगारदातालाई र निर्णय कार्यान्वयन भए नभएको प्रभावकारी अनुगमन गर्न सरकारलाई आग्रह गरे ।

सो अवसरमा नेपाल ट्रेड युनियन महासंघ(जिफन्ट) का अध्यक्ष विनोद श्रेष्ठले न्यूनत ज्याला निर्धारण समितिको वार्ता सुरु भएदेखि नै आफूहरुले कार्यथलो मर्यादित हुनुपर्ने र श्रमिकलाई खान पुग्ने ज्याला हुनुपर्ने पक्षमा आवाज उठाएको बताए । उनले जीवनयापन गर्न पुग्ने ज्याला नपाएकै कारण युवाले बैदेशिक रोजगारमा जानुपर्ने अवस्था अन्त्य हुनुपर्ने धारणा राख्दै आएको उल्लेख गर्दै त्यसैले २० हजार मासिक तलव प्रस्ताव गरिएको बताए । अन्ततः आफूहरु १३ हजार ४ सय ५० मा सहमत भएको भन्दै अहिलेको बृद्धि सम्पूर्ण श्रमिकले प्राप्त गर्नेगरी कार्यान्वयन हुनुपर्ने उनको भनाई थियो । जिफन्ट अध्यक्ष श्रेष्ठले हरेक कारखाना तथा प्रतिष्ठानहरुमा ज्याला बृद्धिका विषयमा छलफल हुने बताए ।

सो अवसरमा नेपाल ट्रेड युनियन काँग्रेसका अध्यक्ष पुश्कर आचार्यले भनें आफुहरुको असहमति रहेको बताए । उनले १७ हजार न्यूनतम ज्याला हुनुपर्ने बताए पनि यसअघि नै रोजगारदाता र ट्रेड युनियनबीच भएको छलफलमा ट्रेड युनियन काँग्रेसले समेत १३ हजार ४ सय ५० मा सहमति जनाइसकेका कारण आचार्य अप्ठ्यारोमा परेका थिए ।

सो अवसरमा जिफन्टका उपाध्यक्ष दिपक पौडेल, रोजगारदाताहरुका तर्फबाट भरतराज आचार्य, चण्डी  ढकाल, शेखर गोल्छा लगायतले सहमतिका बारेमा जानकारी गराएका थिए ।

यो पनि पढ्नुहोस् न्यूनतम तलव १३ हजार ४ सय ५० मा ट्रेड युनियन र रोजगारदाता सहमत