अछाम:  पूर्ण कुँवरले एक जमानामा साझा प्रकाशनमा जागिरसमेत गरे । जागिर बीचमै छुट्यो र नोकरी गर्न छिमेकी मुलुक भारत हानिए । जीवनको उर्जावान समय करिव २० बर्ष भारतका बिभिन्न शहरमा चौकीदारी गर्दैमा बिताएका साँफेवगर नगरपालिका–६ का ५२ वर्षीय कुँवरको जीवनमा भारतको चौकीदारीबाट खासै प्रगति हुन सकेन ।

भारतको चौकीदारीमै जीवन बिते पनि खासै प्रगति हुन नसके पछि घर फर्किएका कुँवरले गाउँका अरु किसानले छोड्दै गएको पशुपालन व्यवसाय अंगालेका छन् । कुँवरले करिव डेढ बर्ष देखि उन्नत जातको गाई पालन व्यवसाय शुरु गरेका छन् ।

कुँवरका अहिले एउटा साँढे, चार वटा बाच्छी र चार गाई गरी नौ गाई रहेका छन् । शुरुमा आफ्नो जमिनको लालपुर्जा बैंकमा राखेर तीन लाख रुपैँया ऋण लिई गाई पालन व्यावसाय शुरु गरेको कुँवर सुनाए ।

उनीसँग भएका सबै गाई उन्नत जातको हुन् । जिल्ला पशुसेवा कार्यालयले गाई ढुवानीको खर्च व्यहोरेको हो । उनको छ जनाको स–परिवार आज भोली दिनभर गाईको घाँस, पराल, पानी खुवाउन तथा गोबर सोर्नमै व्यवस्त हुन्छ ।

बम्बैमा नोकरी गर्दा पनि परिवारको लालनपालन गर्न नपुगेर पैतृक सम्पतिका खेतहरु भोग बन्धकीमा विक्री गरेका कुँवरले यहि व्यवसायबाट एक खेत भोग बन्धकीबाट फिर्ता गरि सकेको र अरु खेत पनि विस्तारै फिर्ता गर्ने आशा पलाएको सुनाए ।

उनले हाल आफ्नो गाईबाट दैनिक १५ लिटर दुध उत्पादन भइरहेको र केहि महिना मै अन्य दुई गाई व्याएमा प्रसस्त दुध उत्पादन हुने आशा पनि व्यक्त गरे ।

हालै उनले साँफेबगरमा डेरीसमेत स्थापना गरी आफ्नो गाईबाट उत्पादित दुध तथा अरुबाट संकलन गरेको दुध विक्रि गरिरहेका छन् ।

उनको आम्दानीमा तरकारी खेतीले थप इट्टा थपेको छ ।

उनले धेरै पछि मात्र आफूलाई पशुपालन व्यवसाय र तरकारी खेती गर्ने बारेमा सोच पलाएको बताए ।